`` علاش أنا`` ؟

خاطر انت .. اللي بيك رجعت نحس و رجعت نعيش رجعت نضحك و نبكي و بالدنيا معلاباليش رجعتلي التبسيمة م القلب كي نشوف ضحكة عينك و نفرح حتى من كلمة `` نعمبو زينك`` الصخرة اللي في القلب ذابت .. الدمعة قربت م الخد و الضحكة خرجت م القلب بعد تدفنت فيه سنين ، لا لقات ثنيتها لا يسار ولا يمين علاش انت؟ موش علاش ... كيفاش؟ كيفاش نجمت انت تعمل هذا الكل ترجعني نشوف الدنيا ياسمين و فل ندور كي المجنونة نشطح نغني و نحب الناس الكل ! كي نشوفك فرحان نحس بالأمان لسابع سماء بالفرحة معاك نطير روحي على روحك خفيفة لا نتعب و لا نحير و كي نشوفك حزين نتهد نكره الدنيا و مافيها و مانطيق حد تحت سابع ارض نتدفن نتخنق بغصتي و الضحكة نحطلها ملحفة بيضا و كفن نحبك ... اكثر م اللي تحب روحك انا اللي نبكي وقت جروحك انت الغصة و انا الشهقة .. انت اللي بيك نطيح و انت اللي بيك نقوم اسمك النغمة اللي عليها كل صباح نقوم انت احلى حكاية نعيشها كل يوم نعرف مانيش اول ولا اخر حكاية عندك

قبل ماتسألني علاش أنا نقلك .. انا نحب الدنيا اما هي ماتحبنيش لا عمري طلبت منها حاجة حبيتها من قلبي نعرفها بش تاخوها و ماتعطيش صحيح انا معاك نسيت الدنيا اما مانيش بش نقلك : ماتخلينيش ، ماتبيعنيش ، و ماتبدلنيش يكفيني في حياتي اللي انا ريتك ، اللي عرفتك و حبيتك في عينيا حطيتك، في روحي خبيتك ، قلبي و حياتي و عمري عطيتك

كان انت خليتني عليك مانلوم ، انا حلمت بالجنة و ريتها و في حضني لقيتها .. لكن انا عايشة في الدنيا و موش في الجنة بش نحل عيني نلقى اللي نتمنى . بش نلقى جنتي بحذايا كل يوم ، كي نغمض عيني و كي نحلها م النوم .. بش نلقى تعنيقة حنينة و بوسة بنينة؟ بش نسمع دقات قلبك و انا بين ايديك... بش نشم ريحتك و نتدلل عليك ؟ كاياني وليت مهبولة و نهتري بيك ، مابين نومين نحلم بيك ، بين الخطوة و الخطوة نخمم فيك و وقت اللي نشوفك متقلق قلبي ياقف م الخوف عليك كلامي قلتو من قلبي و الباقي عليك ، قتلك قبل انت بالدنيا و مافيها .. و توا نقلك انت في حياتي موش بالدنيا .. انت بالجنة .. حلمة صعيبة و فيها اكثر م اللي نتمنى .. اما انا عمري ماسلمت في حلمتي و عمرها حلمتي ماسلمت فيا عندك الحق تسأل اما انا ماعنديش ، نعرف مانيش انا اللي بلا بيها ماتنجمش تعيش .. مانيش بش نقلك كيما قتلي علاش انا ؟ خاطر نعرف اللي في حياتك موش مفما كان انا .. رغم هذا الكل ماعلاباليش و `` انا نحبك انت و مانخبيش` و كان خليتني ` نخترعك في خيالي و بيك نعيش`