كتيبة أفريل
فيبالي حبيت كي العادات نبخل ونعدي نهير سلامات
لانجبد حد و لا يجبدني، نعرف ماينفع الكلام في اللي قلوبهم عمات
أما كيفاش الريشة تنسى ماتكتبلكش ... النهار نهارك اليوم!
قلمي تحرك نفخ على ريشتو الغبرة تنفخت فيه الروح وقام مل النوم
إنت ولي كيفك لا عليكم كلام ولا ليكم لوم
تي الغزرة في عينيكم حرام زقوم ! خلي عاد من سلام اديكم ...
كان جا بيدي لا نرحمكم لا نروف عليكم
غير الوقت عطاكم الطوع والدنيا ماجتش دنيا !
كان جات الدنيا دنيا إنت ولي كيفك بالسم نوسموكم و بالقتال نعطروكم
في بلاصة عالية على قد قدركم نصدروكم
يجيو أعيان البلاد يكبو عليكم! ياقفو عند ساقيكم ! يرحمو على والديكم!
والشعب يبكي وينوح اه!
محلاها كانت تكون الدنيا بلا بيكم
والنساء تولول على روسكم.. من كثر حبكم و حاجتنا ليكم
أما أنا قلمي تحرك اليوم و قلمي عمرو مايكتب الدوانة
والدنيا ماجتش دنيا .. مدامك ولي كيفك فرد صف بحذانا
نجستو بكذبكم كل شي حتى نعمة الكتيبة
كذبكم فيه تفننتو وبالحرف بالحرف كلماتو زينتو
لا خفتو على قصان صوابعكم في نهار غير ليوم
لا خفتو على حرقان لساناتكم و لا من بلعانكم للسموم ..
سموم حروفكم إلي خرجت من حلوقكم وبها بعتو وشريتو
وحتى فالبيع والشراء قد ما طاح قدركم قد ما عليتو في السوم ،وصلتوا بيه للصحاب والغيوم
مسكينة الكتيبة ملي كيفكم تقاسي .. تتفكروها وقت التفليم .. ووقت "ابعد لا نباصي"
تحط فيها اللي منجمتش تحملو على كتافك و منو قلت أي يا راسي !
تصور وتزين كلمتين .. اطير بهم الشك و تلم بهم العينين ..
تكمل بيهم عقاب عمرك الحزين.. تحت رحمة الكذب و نشوة روحي روحي وأنا أنا...
واصل بندر يا بندير وطبل يا طبالة ..
إلي كتبتو إنت في عامين منخسرش عليه أكثر من هل كلمتين وربع سويعة بالمنgaلة!
Commentaires
Enregistrer un commentaire