الكلمة
كل واحد فينا حياتو متكونة من كلمات. الكلمة إلي بدلتلو حياتو والكلمة إلي مينساهاش لاخر حياتو. كلمة تبني وكلمة تهد. كلمة تقدمك وكلمة توخرك. كلمة تهز وكلمة اطيح.كلمة تبكيك وكلمة تضحكك.و من كلمة لكلمة كل واحد فينا كتب كتاب حياتو. الكلمة عندها سلطة كبيرة وهذاكا علاش من عاداتنا نقولو فلان عندو كلمة ولا الراجل على كلمتو ولا كلمة رجال
الكلمة في وقتها المناسب وفي مكانها المناسب تبني أجيال وتحيي أمم. كي تقرى مقال ولا كتاب ولا تسمع حد يتحدث قدامك في أغلب الاحيان تبقى كلمة ملي سمعتو ديمة في ذهنك. وكي تحكي مع انسان تنجم تأثر فيه
بكلمة تجرحو ولا تفرحو بكلمة.
بالرغم من تأثير الكلمة في حياتنا وقدرتها تلقى برشة ناس يحكيو وهوما مش عارفين فاش يحكيو. يرميو في كلمة! يرميو مع الناس إلي ترمي ويحكيو مع الناس إلي تحكي. هذاك علاه مش كل قائد أو سياسي يوصل كلمتو وقتلي يبدى يلقي في كلمة. واحد يشدك ويجذبك حتى بكلمة ولاخر متسمعوش متحسوش ومتفهموش حتى كي يقول ألف كلمة وكلمة
!! و بما انو " خير الكلام ما قل ودل" إن شاء الله يوصلكم كلامي وتتفكروا منو حتى كلمة
Commentaires
Enregistrer un commentaire