العيشة فن إنت الفنان ونتي الفن

العيشة فن...  كلامك فن.. لبستك فن .. مظهرك فن..  ماكلتك فن.. حتى ضحكتك وغزرتك فن .  وفي بلادي كيما يقولو كل شي أذواق! فما ناس عارفة قيمة الدنيا وعايشنها بفن وفما ناس  عمرها كامل لين كبرت ولتوى لا فهمت الدنيا وعايشنها كما جات ... إختلاف الأذواق مهوش لمشكل أما غياب الذوق هو المشكل..

 قليل ناس عايشة حياتها بفن وعايشين يعملوا فالحاجات إلي يحبوها  رغم إلي أبسط لحاجات في حياتنا فن!  قهوة الصباح، موزيكا إلي نحبها ، كتب إلي نقراوه ألف مرة ومنفدوش.. حتى  صباح لخير كي نقولوها فن ... كل شي فن.. وكل واحد فينا فنان.. أما كل فنان وفنو!! كانك تحب لكتيبة إكتب على روحك حتى فقرة صغيرة..  كانك تحب لموزيكا لوج على غنية تحكي عليك.. كنك تحب الرسم انهوا أقرب رسم يصور شخصيتك وحياتك؟ أغزر من بعيد لتصويرتك كما تغزر لغيرك! قيم روحك قيم فنك! 

الفنان  فينا هو إلي يعرف يستغل أبسط تفاصيل حياتو ويصنع منها أكبر نجاحات.. هو إلي يستغل حتى نقاط ضعف إلي فيه ويبدلها لنقاط قوة.. وهو إلي يقلب الموازين والضروف لخايبة يحقق فيها نجاحات لروحو أغلب الناس ماكانوش 

  يتوقعوها .. والأهم مل كل يبدا فرحان وراضي على روحو وعلى فنو

بالفوشه  بالقلم بيديك بصوتك بكلامك بأفعالك ... إنت قاعد تكتب في روحك وتصور في شخصيتك وإنت الانسان الوحيد إلي مسؤول على هذا .. إنت الفنان ونتي زادة الفن